कपिलवस्तु ।
नेपाल प्रहरीका अतिरिक्त महानिरीक्षक (एआईजी) उमा प्रसाद चतुर्वेदीले नागरिकको सुरक्षा नै प्रहरीको कर्तव्य भएको बताउनुभएको छ । एआइजी चतुर्वेदीले समुदायको विश्वास र सहकार्य बिना प्रभावकारी प्रहरी सेवा सम्भव नहुने बताएका छन् ।

कपिलवस्तुको कृष्णनगरमा कृष्णनगर उद्योग वाणिज्य संघले आयोजना गरेको “एआईजी सम्मान कार्यक्रम”मा बोल्दै उहाँले भन्नुभयो, “नेपाल प्रहरी केवल कानूनी निकाय होइन, यो समाजको अभिन्न हिस्सा हो ।अपराध नियन्त्रण, शान्ति सुरक्षा र विकासको पूर्वशर्त नै प्रहरी र समुदायबीचको विश्वास हो ।”
उहाँले प्रहरी सेवामा पारदर्शिता, उत्तरदायित्व र जनमुखी दृष्टिकोणलाई प्राथमिकता दिनुपर्नेमा जोड दिनुभयो ।

एआइजी चतुर्वेदीले नेपाल प्रहरीलाई आधुनिक प्रविधि र सामुदायिक सहभागितासँग जोडेर अघि बढाइरहेको उल्लेख गर्दै जनताको विश्वास जित्नु नै प्रहरीको ठूलो उपलब्धि भएको बताउनु भयो ।

एआईजी उमा प्रसाद चतुर्वेदीलाई कृष्णनगर उद्योग वाणिज्य संघका अध्यक्ष रितेश शर्माले माला, खादा र प्रशंसापत्र अर्पण गरी सम्मान गर्नुभएकाे थियो ।

कार्यक्रममा अतिथिका रूपमा प्रहरी उपरीक्षक सन्तोष आचार्य सशस्त्र प्रहरी बलका नायब उपरीक्षक तुलाबहादुर चाैधरी समेत सहभागिता रहेको थियो ।
कार्यक्रममा कांग्रेस नेता ब्रहम्मानन्द उपाध्याय, अकिल मिया, मुक्तेश्वर मिश्रा, विनय गिरी, नेकपा माओवादी केन्द्रका नेता जावेद आलम खाँ हुनुन्थ्यो । त्यस्तै समाजसेवी कुनाल प्रताप शाहले एआइजी उमा प्रसाद चतुर्वेदीलाई २० किलोको मालाले स्वागत गर्नुभएको थियो ।

कार्यक्रममा कृष्णनगर नगरपालिकाको दलित समुदायबाट एमबिबिएस गरेकि डक्टर स्मृति हरिजनलाई समेत सम्मान गरिएको उद्योग वाणिज्य संघ कृष्णनगरले जनाएको छ ।

कार्यक्रमको स्वागत मनतब्य महासचिव हरि ओम तुलस्यानले गर्नुभएकाे थियाे भने शुभकामना मन्तव्य कृष्णनगर उद्योग वाणिज्य संघका अध्यक्ष रितेश शर्माले दिनुभएकाे थियाे ।