काठमाडौँ : राष्ट्रियसभाका सांसदहरूले किट विश्वविद्यालयमा अध्ययनरत नेपाली छात्राको मृत्यु प्रकरणबारे सरकारको ध्यानाकर्षण गराएका छन्।

आइतवार राष्ट्रियसभा बैठकको आकस्मिक समयमा बोल्दै सांसदहरूले भारतको किट विश्वविद्यालय र बेलायतमा अध्ययनरत छात्रको मृत्युका घटनाबारे छानबिन गर्न सरकारको ध्यानाकर्षण गराएका हुन्।

नेपाली काँग्रेसका सांसद कृष्णबहादुर रोकायले भारतको कलिंगास्थित किट विश्वविद्यालय अध्ययनरत छात्राको मृत्यु तथा बेलायतमा मृत भेटिएका एक व्यक्तिको कूटनीतिक पहलको माध्यमद्वारा सत्यतथ्य पत्ता लगाउन सरकारको ध्यानाकर्षण गराए। उनले दोषीलाई कारबाही गर्न र पीडितलाई उचित क्षतिपूर्तिका लागि पहल गर्न आग्रह गरे। उनले भविष्यमा यस्ता घटना दोहोरिन नदिन सरकारको गम्भीर ध्यानाकर्षण गराए। नेपाली विद्यार्थी अध्ययनरत ती कलेजमा पूर्ण सुरक्षाको प्रत्याभूतिका लागि नेपाल सरकारले कूटनीतिक पहल गर्नुपर्ने उनको भनाइ छ।

रोकायले भने, ‘किट विश्वविद्यालयमा अध्ययनरत नेपाली छात्रा प्रिसा साहको मृत्यु प्रकरणपछि नेपाल सरकारले समयमै चासो जनाएको बुझिएको छ। परारष्ट्र मन्त्रालयले किटमा अध्ययनरत विद्यार्थीको सुरक्षाका लागि समन्वय पनि गरेको जनाएको छ। किटमा करिव ४० हजार विद्यार्थी अध्ययनरत रहेकोमा नेपाली विद्यार्थीको संख्या करिव १२ सय भएको बुझिएको छ। त्यस्तै लण्डनमा मृत भेटिएका सुशासनको लण्डन प्रहरीबाट अझै अनुसन्धान जारी रहेको बताइएको छ। यी दुबै देशमा भएका दुवै घटनाका कुटनीतिक पहलको माध्यमबाट सत्यतथ्य छानबिन गरी दोषीलाई हदैसम्मको कारबाहीको पहल, पीडितलाई उचित क्षतिपूर्तिको पहल तथा उक्त कलेजहरुमा विद्यार्थीहरुको पूर्ण सुरक्षाको प्रत्याभूति र आगामी दिनमा यस्ता घटना दोहोरिन नदिन नेपाल सरकारको गम्भीर ध्यानाकर्षण गराउन चाहन्छु।’

नेकपा (माओवादी केन्द्र) की सांसद गंगाकुमारी बेलवासेले भारतको किट विश्वविद्यालयमा अध्ययनरत नेपाली विद्यार्थीको मृत्युबारे छानबिन गर्न विशेष समिति गठन गर्न नेपाल सरकारसँग माग गरिन्। उनले स्थानीय विद्यार्थीले प्रतिस्पर्धा गर्न नसकेपछि राम्रो अध्ययन गर्ने विदेशी विद्यार्थीलाई बेपत्ता पार्ने तथा हत्या गर्नेसम्मका घटना उक्त कलेजमा हुने गरेको दाबी गरिन्।

नेकपा एमालेकी सांसद सुमित्रा बिसीले किट विश्वविद्यालयमा मृत्यु भएकी नेपाली छात्राबारे सत्यतथ्य छानबिनका लागि भइरहेको पहललाई तीव्रताका साथ अगाडि बढाउन सरकारको ध्यानाकर्षण गराइन्।

नेकपा (एकीकृत समाजवादी) की सांसद मदनकुमारी साहले किट विश्वविद्यालयमा हुने गरेको मृत्युका घटनामा विद्यार्थीलाई दोषी देखाएर त्यहाँको प्रशासन उम्किने गरेको आरोप लगाइन्। थाहा खबर