काठमाडौँ । प्रतिनिधिसभाको गत शुक्रबारको बैठकमा बोल्दै प्रधानमन्त्री केपी शर्मा ओलीले सरकारले गरेको २०० दिनको उपलब्धिको बारेमा चर्चा गरे । सरकारको प्रशंसा र विपक्षीको आलोचनामा करिब ४९ मिनेट खर्चिएका ओलीको भनाइको सार थियो– यो सरकारले गज्जबै गरिरहेको छ । जति जे नराम्रो छ अघिल्लो सरकारको कारणले भयो ।

ओलीले भनेका तीन चारवटा कुरा यहाँ स्मरणीय छन् । उनले सिद्धार्थ राजमार्गमा पहिरोमा परेर मृत्यु भएका व्यक्तिको समाचारले भावुक बनाएर शिद्धबाबा सुरुङमार्ग निर्माण गरेको र अहिले ब्रेकथ्रु भएको प्रसङ्ग निकाले । विगतको सरकारका कारण अर्थतन्त्रको अवस्था कमजोर भएको भन्दै अहिलेको सरकार आएपछि अर्थतन्त्रका सूचकमा सुधार हुँदै गएको उनको अर्को दाबी थियो ।