काठमाडौं । नेपालमा चिनियाँ नागरिकको अपराध रोक्न सरकारले कडा कानुन ल्याएको छ । उपप्रधानमन्त्री एवम् गृहमन्त्री नारायणकाजी श्रेष्ठले प्रहरी र अध्यागमन अधिकारीलाई आगामी दिनमा चिनियाँ नागरिकमा केन्द्रित हुने गरी नयाँ कार्यदिशा तय गरेका छन् ।
उनले नेपालमा चिनियाँ नागरिकले गर्ने विभिन्न आपराधिक र आर्थिक गतिविधिलाई रोक्नका लागि कुनै पनि चिनियाँ नागरिकमाथि स्वतन्त्ररुपमा छापा मार्न सक्नेगरी प्रहरीलाई निर्देशन दिएका छन् ।

गृहमन्त्रीको निर्देशनअनुसार प्रहरीले कुनै पनि शंकास्पद चिनियाँ गतिविधिमा छापा मार्ने र कसैको डर र दबाब बिना स्वतन्त्र छापा मार्न सक्नेछ ।

गृहमन्त्रीले लागु गरेको नयाँ अप्रेसनको उद्देश्य नेपालमा चिनिया अवैध कार्यक्रमहरूलाई प्रभावकारी नियमन गर्न र चिनियाँ गैरकानूनी गतिविधिहरूलाई रोक्न तथा अवैध व्यापार सञ्चालन गर्न निरुत्साहित गर्नु रहेको गृह मन्त्रालयले जनाएको छ ।

गृहमन्त्रीको नयाँ योजनाअनुसार अब प्रहरी र अध्यागमनले नेपालमा वायर ठगी र साइबर अपराधमा संदिग्ध चिनियाँ संलग्नतालाई लक्षित गरी छापा मार्नेछ । नेपालमा अवैध रुपमा बस्न खोज्ने चिनियाँ नागरिकमाथि सतर्कता र निगरानी बढाइनेछ ।

यसैगरी विभिन्न आयोजनाहरुमा कामदारको रुपमा आएका चिनियाँ नागरिकको पुन: जाँच गर्ने र समय सकिएकालाई फर्काउने नीति लिइएको छ । ‘नियमहरूको पालना र उचित दर्ता सुनिश्चित गर्न निर्माण परियोजनाहरूमा चिनियाँ संलग्नताको छानबिनलाई तीव्र बनाइनेछ । सबै निर्माण कर्मचारी र परियोजना संचालकलाई पुन: परिक्षण गर्ने छ र मूल समयबाट पछि कुनै मिति थप्न नदिने,’ नयाँ कार्ययोजनामा भनिएको छ ।

योजनाअनुसार नियमनको अनुरूपता प्रमाणित गर्न सबै चिनियाँ लगानी, कम्पनी र लेनदेनहरूको पूर्ण प्रमाणीकरण गरिनेछ ।

यसैगरी काठमाडौंमा चिनियाँ सञ्चालित होटलहरूमा प्रहरीले छापा मार्ने गरी करको पालना, सम्भावित जुवा र अन्य नियामक दायित्वहरूबारे छानबिनको विषय बनाइने मन्त्रालयले जनाएको छ ।

यसअनुसार प्रहरीले चिनियाँहरुको शंकास्पद गतिविधि ठाउँसमेत पहिचान गरेको छ ।

ललितपुरको जुपिटर मार्गस्थित फबुलोस् फिटनेस रहेको कमल रुग इण्ड्रस्टीको टप फ्लोर, उक्त भवनको टप दुई फ्लोरमा शंकास्पद गतिविधि हुने गरेको सुरक्षा अधिकारीले पत्ता लगाएका छन् ।

उक्त ठाउँमा बा १ च ७८४८ र बा जेड च २७३० नम्बरको कार चिनियाँले प्रयोग गर्दै गरेको पाइएको छ । थुप्रै क्यामेराहरु सुरक्षाका लागि वरिपरिका पसलमा जडान गरिएको छ । जसले यो शंकास्पद स्थान दर्शाउँछ ।

नेपालमा पिपुल रिपब्लिक चाइनाको तिब्बत विरोधी प्रयाससँग जोडिएका व्यक्तिको स्वामित्वमा उक्त भवन रहेको छ ।

यसैगरी घर नम्बर ४४९/४६ रहेको कपुरबोट खड्का टोल मार्ग एकान्तकुना ललितपुरमा पनि चिनियाँले शंकास्पद गतिविधि गर्दै आएको सुरक्षा रिपोर्ट छ । नयाँ कार्यादेशअनुसार प्रहरीले छापेमारीको तयारी गरेको छ । भिजन गेस्ट हाउसनजिकैको भवनबाट नेपालमा रहेको तिब्बती शरणार्थीमाथि दबाब बढाउनका लागि चिनियाँले सेल्टर बनाइरहेको सुरक्षा अधिकारीको रिपोर्ट छ । नेपालपाना