१६ चैत्र २०८०, शुक्रबार

रविमा नैतिकता पनि हरायो

प्रचण्ड, देउवा, ओलीजस्तै नयाँ नेता पनि सत्ता स्वार्थमै सीमित

काठमाडौँ । पछिल्लो केही दिनयता निकै चर्चामा रहेका रवि लामिछाने फेरि पनि सत्ता स्वार्थमा सीमित हुँदा उनको नैतिकतामाथि पनि प्रश्न उठ्न थालेको छ । उनले आइतबार मात्रै नागरिकताको प्रतिलिपि लिए । उनको पहिलेको नागरिकता कायम नरहेको भन्ने सर्वोच्च अदालतको आदेशपछि उनले आइतबार सांसद, मन्त्री र सभापति पद गएपछि निवेदन दिएर नयाँ नागरिकता लिएका हुन् ।

उनले नागरिकता पाएलगत्तै फेरि बालुवाटार पुगेर आफूलाई गृहमन्त्री बनाउन प्रधानमन्त्री पुष्पकमल दाहाल प्रचण्डसँग माग गरेका थिए । तर उनलाई मन्त्री बनाउन नसकिने मुडमा प्रचण्ड छन् । तर सत्ता स्वार्थमा परेपछि नयाँ पार्टी, नयाँ युवा र धेरैको आशाका रुपमा उदाएका रवि लामिछाने फेरि नैतिकताको प्रश्नमा उभिएका छन् ।

उनले यसअघि लिएको दोहोरो राहदानीको विषयमा छानबिन जारी छ । उनले दोहोरो राहदानी दुरुपयोगको प्रश्न पनि पेचिलो छ । तर यी सबै प्रश्न बेवास्ता गर्दै रवि लामिछाने फेरि गृहमन्त्री बन्न आतुर छन् । उनी अब सांसद छैनन् । तर सांसद नहुँदा पनि उनलाई मन्त्री बन्ने हतारो छ ।

यस्तो अवस्थामा कम्तीमा नयाँ अनुहार र युवा भएर पनि राजनीतिमा आएर उच्च नैतिकता देखाउनुको साटो केवल सत्ता र स्वार्थमुखी हुनु लाजमर्दो हो । हिजो सबै नेताहरूलाई गाली गर्दै नैतिकताको पाठ सिकाउने रवि लामिछाने आज आफ्नै हैसियतमाथि प्रश्न उठेका बेला गृहमन्त्री बन्न बालुवाटार धाउनुले धेरै प्रश्न उठाएको छ ।

नेपाली राजनीतिमा नैतिकताको खडेरी परेका बेला सत्तामा रवि लामिछाने र मेयर बालेन शाहमा पनि त्यो कमी देखिएको छ । बालेन शाह यतिबेला आफ्नो काम गराइमा प्रश्न उठाउनेलाई उल्टै प्रश्न सोधेर गैरजिम्मेवारीपन देखाइरहेका छन् ।

बालेनले काठमाडौँ बनाउने नाममा पहिलेको भन्दा केही राम्रा कामको सुरुवात गरेका छन् । तर टुकुचा खोला उत्खनन गरेर अलपत्र छाड्दा त्यसको चौतर्फी आलोचना भयो । सुकुम्बासीलाई व्यवस्थापन गर्नका लागि सबैसँग परामर्श गरेर निर्णायक कदम चाल्न छाडेर उनले केवल हल्ला मच्चाउन मात्रै डोजर चलाउन थालेको विश्लेषण भइरहेको छ ।

पछिल्लो समय बालेन आलोचित हुँदा त्यसको जवाफ कामबाट दिनुको साटो उनी केवल आफ्नो प्रशंसा गर्नेलाई मात्रै स्पेस दिइरहेका छन् । यसले पनि नयाँ पुस्तामा नैतिकताको खडेरी पर्न थालेको छ । पुरानो पुस्ताका नेताहरूमा त यतिबेला प्रचण्ड काफी छन् ।

जसले हिजोका दिनमा दुईपटक संसद् विघटन गरेका एमाले अध्यक्ष केपी शर्मा ओलीसँग प्रधानमन्त्रीको लोभमा संविधान मास्ने प्रतिगमनसँग सम्झौता गरेर सत्तामा टाँसिए । यसले नेपाली राजनीति कति धेरै अवसर र स्वार्थमुखी छ भन्ने देखाउँछ । यसले अब नागरिकमा पुराना नेता मात्रै होइन, नयाँ नेताका रुपमा उदाएका रवि लामिछानेको पनि नैतिकता हराउन थालेको महसुस हुन थालेको छ ।

धेरै कमेन्ट गरिएका

ताजा उपडेट