काठमाडौँ : उद्योग, वाणिज्य तथा आपूर्तिमन्त्री दामोदर भण्डारीले व्यवसायीहरूले नेपालमै उत्पादित वस्तु निर्यात गरेर नाफा कमाउनुपर्ने बताएका छन्।

शनिवार काठमाडौँमा नेपाल हिमालयन सीमापार वाणिज्य महासंघद्वारा आयोजित कार्यक्रममा बोल्दै उनले यस्तो बताएका हुन्। उनले विदेशबाट वस्तु आयात गरेर नाफा कमाउनेले नेपालमै कुनै न कुनै उद्योग कलकारखानामा लगानी गर्नुपर्ने बताए। नेपालमा उत्पादित वस्तुको ब्राण्डिङ र लेवलिङ गरेर विश्व बजारमा निर्यात गरे मात्रै व्यवसायी र राज्य फस्टाउन सक्ने उनको भनाइ छ।

उनले नेपाल छिमेकी ठूला दुई राष्ट्र चीन र भारतको बजार बनेको तर नेपालले वस्तु उत्पादन गरेर ब्राण्डिङ गर्न नसक्दा समस्या आएको बताए। उनले वस्तु आयातबाट भएको नाफाबाट राजधानीमा घर बनाएर सुखसयलमा बसेर मात्रै समृद्ध हुन नसक्ने बताए।

मन्त्री भण्डारीले भने, ‘हामी केवल ट्रेडिङ गरी राख्या छौँ, आज तुलना गरौँ इण्डियाको सबैभन्दा ठूलो ट्रेडिङ नेपाल हो, चाइनाको पनि ठूलो ट्रेडिङ नेपाल हो। हामीले कसलाई ट्रेडिङ बनाउन सक्यौँ। या हामीले हाम्रो व्यापारको विविधकीरण गर्ने कुरा व्यापारको प्रमोशन गर्ने कुरा, हाम्रो वस्तुको ब्राण्डिङ गर्ने, प्याकेजिङ गर्ने, लेवलिङ गर्ने कुरा हामीले सक्यौँ त ? मेरो आग्रह छ‚ यहाँहरूले वस्तुको ट्रेडिङ गर्दा तपाईंले मुनाफा गरिसकेपछि कुनै न कुनै उत्पादनमा तपाईंको लगानी त हुनै पर्‍यो नि।’

मन्त्री भण्डारीले हिमालयपार व्यापारलाई समृद्ध बनाउन सरकार तयारी अवस्थामा रहेको बताए। मन्त्री भण्डारीले नेपालमा उत्पादन भएका ५ हजार वस्तु चीनमा बिनाभन्सार दरमा नेपालले निर्यात गर्न पाउने चीनसँग सम्झौता भएकाले नेपालमा उत्पादित वस्तु चीनमा निर्यात गर्न आग्रह गरे। थाहा खबर