काठमाडौँ ।हङकङमा प्रजातन्त्रको माग गर्दै बेलायतको म्यान्चेस्टर सहरस्थित चिनियाँ नियोगअगाडि प्रदर्शनमा उत्रेका प्रदर्शनकारीलाई अज्ञात मानिसको समूहले नियोगभित्रै लगेर कुटपिट गरेका छन् ।

आइतबार म्यान्चेस्टर सहरस्थित चिनियाँ नियोगअगाडि प्रदर्शनमा उत्रेका प्रदर्शनकारीलाई नियोगभित्रबाट आएका अज्ञात मानिसहरुको समूहले कुटपिट गरेको बीबीसीले जनाएको छ ।

प्रदर्शन गर्ने क्रममा नियोगको हाताभित्रबाट आएका अज्ञात मनिसहरुको समूहले प्रदर्शनकारीलाई नियोगभित्र लगेर कुटपिट गरेका हुन् । बब नाम गरेका ती प्रदर्शनकारीले आफूलाई प्रहरी र अन्य प्रदर्शनकारीले सुरक्षित स्थानमा लैजानुअघि कुटपिट गरेको जनाएका हुन् ।

‘उनीहरुले मलाई भित्र लगे र कुटपिट गरे ।’ प्रदर्शनकारीलाई उद्धृत गर्दै बीबीसीले जनाएको छ । नियोगका प्रवक्ताले भने प्रदर्शनकारीले राष्ट्रपति सी जिन्पिङको ‘आपत्तिजनक’ तस्वीर प्रदर्शन गरेको दाबी गरेका छन् ।

बेलायतको विदेश मन्त्रालयले घटनाबारे थप जानकारी लिइरहेको जनाएको छ । ग्रेटर म्यान्चेस्टर प्रहरीले घटनाबारे अनुसन्धान अघि बढाएको जनाएको छ ।

ती प्रदर्शनकारीले बीबीसी चिनियाँ सेवालाई दिएको जानकारीअनुसार ‘मुख्यभूमिका मानिसहरु’ चिनियाँ नियोग भित्रबाट आएर प्रदर्शनकारीको पोस्टर र नारा लेखिएका ब्यानरहरुमा क्षति पुर्याएको जनाएका छन् ।

घटनाअघि नियोगका अधिकारीले प्रदर्शनकारीहरुलाई बाटो पारी केही टाढा गएर प्रदर्शन गर्न आग्रह गरेको जनाइएको छ । घटनाका समयमा सो स्थानमा दुई जना प्रहरी तैनाथ रहेको र घटनालगत्तै थप प्रहरी परिचालन गरिएको बीबीसीले जनाएको छ ।

बेलायती भूमिमा नियोगको कार्यालय रहेको भएपनि कूटनीतिक प्रवधानअनुसार नियोग परिसरभित्र बेलायती प्रहरी प्रवेश गर्न नपाउने प्रावधान रहेको छ । चिनियाँ कम्युनिष्ट पार्टीको महाधिवेशन जारी रहेको अवस्थामा प्रदर्शनको आयोजना गरिएको हो ।