चीनकाे हाइपरसोनिक मिसाइल परीक्षणपछि अमेरिका एक्सनमा
एजेन्सी ।
अमेरिकी रक्षा मन्त्रालयका एक वरिष्ठ अधिकारीले चीनले गुपचुपरुपमा गरेको हाइपरसोनिक क्षेप्यास्त्र परीक्षणलाई स्पुतनिक लञ्चसँग तुलना गरेका छन् । सन् १९५७ मा रुसले स्पुतनिक भूउपग्रह लञ्च गरेपछि शीत युद्धमा अमेरिका र रुसबीच हतियारको रेस सुरु भएको थियो । अमेरिकी सेनाको जोइन्ट चिफ अफ स्टाफका प्रमुख मार्क मिलीले ब्लूमबर्ग न्यूजलाई दिएको एक अन्तरवार्तामा यो बयान दिएका हुन् । उनका अनुसार चीनको सेना तीव्ररुपमा विस्तार भइरहेको छ ।
मार्क मिलीले भने, ‘हामीले देख्यौँ कि चीनले निकै महत्त्वपूर्ण हाइपरसोनिक हतियारको परीक्षण गर्यो, यो ठुलो चिन्ताको विषय हो । यो स्पुतनिकको क्षण जस्तै हो जसले हाम्रो पुरा ध्यान त्यसतर्फ तानेको छ ।’
अमेरिकी पक्षले हाइपरसोनिक क्षेप्यास्त्रको बारेमा सार्वजनिक रुपमा बयान दिएको यो पहिलो अवसर हो । तर पेन्टागनका प्रवक्ता जोन किर्बीले मिलीको टिप्पणीमा प्रतिक्रिया दिन अस्वीकार गरे । उनले भने, ‘यो कुनै नयाँ प्रविधि होइन, जसको बारेमा हामीलाई थाहा नहोस् ।’ किर्बीले अमेरिका पनि आफ्नो सुरक्षातन्त्र र हाइपरसोनिक प्रविधिमा काम गरिरहेको बताए ।
बेलायती पत्रिका फाइनान्सियल टाइम्समा केही समयअघि चीनले गत अगस्तमा गुपचुपरुपमा अन्तरिक्षबाट हाइपरसोनिक क्षेप्यास्त्रको परीक्षण गरेको समाचार प्रकाशित गरेको छ । यस खबरबाट अमेरिकासहित विश्वका कयौँ देश हैरान बनेका थिए । यद्यपि, चीनले भने उक्त समाचारको खण्डन गर्दै क्षेप्यास्त्र नभएर एक अन्तरिक्ष यानको परीक्षण गरेको बताएको थियो ।
हाइपरसोनिक मिसाइल ध्वनिको गतिभन्दा पाँच गुणा तीव्र गतिमा हमला गर्न सक्छ र यसलाई एयर डिफेन्स सिस्टमले पनि रोक्न सक्दैन । गत हप्ता अमेरिकाले पनि हाइपरसोनिक मिसाइलको परीक्षण गरेको बताइएको छ ।
3