विजयनगर। कपिलवस्तुको विजयनगर गाउँपालिकामा जारी चौथो राष्ट्रपति रनिङ्ग शिल्ड प्रतियोगितामा दूधाधारी नमुना माध्यमिक विद्यालय, गुगौलीले रेफ्रीको पक्षपातपूर्ण निर्णयको विरोधमा प्रतियोगिता बहिष्कार गरेको छ ।

छात्रतर्फको फाइनल कबड्डी खेलमा जनजागृति मावि लोहरौला र दूधाधारी मावि गुगौलीबीच प्रतिस्पर्धा भइरहेको बेला रेफ्रीले पटक–पटक अनुचित निर्णय लिएको भन्दै दूधाधारी माविले खेल जारी राख्न अस्वीकार गरेको हो । विद्यालयका प्रधानाध्यापक सुग्रीव प्रसाद कोरीले रेफ्रीको निर्णय गलत र अन्यायपूर्ण भएकाले खेल बहिष्कार गर्न बाध्य भएको बताए ।

भिडियोमा पनि देखियो पक्षपात ।।

प्रधानाध्यापक कोरीका अनुसार खेलका क्रममा रेफ्रीले रेडरले कुनै पनि खेलाडीलाई नछोएको अवस्थामा समेत आउटको निर्णय गरेका थिए । उक्त घटना खेलमैदानमा उपस्थित दर्शकले प्रत्यक्ष रूपमा देखेको र बनाइएको भिडियोमा समेत प्रस्ट देखिएको छ । “यसले विद्यार्थी र खेलाडीहरूको मनोबल घटाएको छ,” उनले भने ।

रेफ्री संयोजकको आलोचना ।।

दूधाधारी माविले प्रतियोगितामा रेफ्री संयोजकको भूमिकामा रहेको भुनेश्वरी माध्यमिक विद्यालयका शिक्षक खिम थापामाथि गम्भीर आरोप लगाएको छ । विद्यालयका शिक्षकहरूले भुनेश्वरी माविले इमिस (शैक्षिक तथ्यांक व्यवस्थापन प्रणाली) मा नाम नभएका विद्यार्थीलाई रेफ्री संयोजक थापाको निर्देशनमा खेलमा सहभागी गराएको दाबी गरेका छन् ।

विजयनगर गाउँपालिकामा सञ्चालित चौथो राष्ट्रपति रनिङ्ग शिल्ड प्रतियोगितामा रेफ्रीले छात्रतर्फ कबड्डी खेलमा १५ मिनेट खेलाउनुपर्नेमा ७:३० मिनेट मात्र खेलाएको छ ।

भुनेश्वरी मावि जगीदिशपुर र नेपाल तारा मावि मङ्गरघट्टीबीच भइरहेको छात्रतर्फ खेलमा रेफ्रीले गलत तरिकाले खेलाएको छ ।

नेपाल तारा माविका खेल शिक्षकल खेलाउने समय नसकेको रेफ्रीले जानकारी दिँदा समेत नेपाल तारालाई हराउने अभिप्रायले समय सकिएको भन्दै प्राविधिक टोलीले खेलाडीहरूबीच हात मिलाउन लगाई बाहिर पठाएको छ ।

खेल व्यवस्थापन समितिमा असन्तुष्टि ।।

दूधाधारी माविका अनुसार खेल व्यवस्थापन समितिलाई सही निर्णय लिन पटक–पटक आग्रह गर्दा पनि कुनै सुनवाइ नभएको आरोप छ । “न्याय पूर्ण समाधान नगरेको र खेलको विवादलाई स्थगित नगरी अन्य खेल अगाडि बढाइएको छ,” कोरीले भने ।

प्रतियोगिता बहिष्कारको कारण ।।

प्रधानाध्यापक कोरीका अनुसार दूधाधारी माविले प्रतियोगितामा अहिलेसम्म ७ स्वर्ण, ६ रजत, र ८ कास्य पदक जितेर उत्कृष्ट प्रदर्शन गरेको थियो । यद्यपि, विद्यालयलाई जानाजानी पराजित गराउने उद्देश्यले पक्षपातपूर्ण निर्णय गरिएको उनको आरोप छ ।

त्यसैगरी, दौड प्रतियोगितामा भुनेश्वरी माविका खेलाडीहरूले दूधाधारी माविका खेलाडीलाई जानाजानी खुट्टा लगाई लडाउन खोज्दा पनि कुनै कारबाही नगरिएको उनले बताए ।

विद्यार्थीहरू निराश ।।

दूधाधारी माविका विद्यार्थीहरूले रेफ्रीको बदमासीका कारण ठूलो निराशा व्यहोर्नु परेको बताउँदै, यस किसिमका घटनाले खेलकुदमा प्रतिस्पर्धा भन्दा पनि विवादलाई बढावा दिने बताएका छन् ।

निष्पक्ष छानबिनको माग ।।

दूधाधारी माविले प्रतियोगितामा भएका सबै पक्षपातपूर्ण निर्णयहरूको छानबिन गरी उचित समाधान गर्न माग गरेको छ । साथै, आगामी प्रतियोगिताहरूमा निष्पक्षता कायम राख्न योग्य र अनुभव भएका रेफ्री तथा प्राविधिक टोलीलाई मात्रै जिम्मेवारी दिनुपर्नेमा विद्यालयले जोड दिएको छ ।

समग्रमा विवादित प्रतियोगिता ।।

विजयनगरमा आयोजना गरिएको राष्ट्रपति रनिङ्ग शिल्ड प्रतियोगिता यसपटक विवादास्पद बनेको छ । स्थानीय तथा सहभागी विद्यालयहरूले पनि प्रतियोगिताको व्यवस्थापन र रेफ्रीका निर्णयप्रति गम्भीर असन्तुष्टि व्यक्त गरेका छन् । खेलकुद क्षेत्रमा निष्पक्षता र प्रतिस्पर्धाको भावना जोगाउन यस्ता घटनाको पुनरावृत्ति रोक्नुपर्नेआवश्यकतामा सबैले जोड दिएका छन् ।