कपिलवस्तु । कपिलवस्तुका १० स्थानीय तहमध्ये ८ पालिकाले आगामी आर्थिक वर्षको बजेट ल्याएका छन् । जिल्लाको शुद्धोदन र मायादेवी गाउँपालिकाले भने आगामी आर्थिक वर्षका लागि बजेट निर्धारित समयमा ल्याउन सकेको छैनन् ।

असार १० गतेभित्र स्थानीय तहले बजेट ल्याउनु पर्ने संवैधानिक व्यवस्था रहेको छ । जस अनुसार कपिलवस्तुका कपिलवस्तु बुद्धभुमि, बाणगंगा, शिवराज, महराजगंज र कृष्णनगर नगरपालिकाले सोमबार बजेट ल्याएका छन् । यस्तै बिजयनगर गाउँपालिकाले पनि वार्षिक नीति र कार्यक्रमसहित बजेट ल्याएको छ ।

यसअघि कपिलवस्तु नगरपालिकाले ९६ करोड १८ लाख ८३ हजारको बजेट ल्याएको थियो । बुद्धभुमि नगरपालिकाको बजेट १ अर्ब २० करोड ३२ लाख ९६ हजार रहेको छ । महाराजगन्ज नगरपालिकाको बजेट १ अर्ब ३ करोड ४९ लाख रहेको छ ।

यस्तै बाणगंगा नगरपालिकाको बजेट १ अर्ब ६२ करोड ४६ लाख ८६ हजार रहेको छ भने शिवराज नगरपालिकाले १ अर्ब २४ करोड ७९ लाख ५६ हजारको बजेट ल्याएको छ । कृष्णनगर नगरपालिकाले बजेट ७१ करोड ४० लाख ३६ हजारको बजेट ल्याएको छ । यस्तै बिजयनगर गाउँपालिकाको ६४ करोड २५ लाख ५० हजार बजेट ल्याएको छ । जिल्लाका अधिकांश स्थानीय तह शिक्षा र स्वास्थ्यमा केन्द्रित भएर बजेट ल्याएका छन् ।